17 июль көнне Әнкара шәһәрендә 93 яшендә татар халкынын бөек улы җәмагать эшлеклесе, журналист Гали Акыш вафат булды. Маньчжуриядә туып үссә дә, аның язмышы  Мисыр, Польша, Германия, Төркия илләре белән тыгыз бәйләнештә булды.

 

Кайда гына булсада Гали Акыш гомерен  милләтнең үсешен  тәэмин итүгә багышлады, «Азатлык» радиосындагы эшчәнлеге аша дөнья куләмендә булган демократик ирекләрне милләт өчен файдаланып килде. Бөтендөнья татарлар лигасы үрнәгендә үзен заман сулышын тоеп, глобаль проектны төзи алырлык, аны җитәкләрлек лидер (башта рәис, соңыннан мактаулы президенты)  буларак курсәтте.

 

 

Уз гомеремдә мин Гали Акыш белән бер мәртәбә генә очраштым, аралашканнан соң  аның әдәпле, зыялы, интеллигент кеше булуына инандым. Үз үзен тотышыннан, әйткән фикерләреннән аның интеллектуаль элитаның вәкиле икәнен анлап була иде.

 

Татар эмиграциясе традицияләрендә тәрбияләнгән, Гаяз Исхакыйның шәкерте, варисы булган Гали Акышка  ниндидер харизма да хас иде.  Шуңада аның эшчәнлеге, фикерләре татар дөньясы тарафыннан зур кызыксыну белән күзәтелеп барды.

 

Чаллыда милли хәрәкәт тәкъдиме буенча Гали Акышнын исемен 1997 елдан бирле 84 нче лицей йөртә. Гали әфәнденең лицейның элекеге бинасында булганы да бар иде. Ул очрашулар лицей хезмәткәрләре күңелендә якты хәтирәләр, тәэсирләр булып калыр һәм мәнге җуелмаслар.

 

2007 елны лицей-интернат статусын алып, яңа бинага күчкәч 1 сентябрь бәйрәменә Гали Акыш укучыларга үзенең түбәндәге котлау сүзләрен җиткерде: «Без милләтебезне, телебезне, мәдәниятебезне саклап, кыямәт көненә кадәр ирекле булып яшәрдәй яхшы галимнәр үстерергә тиешбез. Алар киләчәктә милләт өчен хезмәт итсеннәр, ана телен яратсыннар, динне хөрмәт итсеннәр, тарихны белсеннәр, бөтен дөнья белән дус яшәсеннәр иде».

 

Гали Акышнын эшчәнлеге, фикер йөртүе зур күләмле иде, безнең хәтеребездә дә ул  тарихи шәхес булып калачак.

 

 

Бөтендөнья татар конгрессының

Яр Чаллы бүлеге рәисе,

Гали Акыш исемендәге 84 нче

лицей-интернат директоры

Закиров Шамил Рәкыйп улы